過年後首次回工作室聽歌，突然抽起條筋，找部放低近十年的 DIY 機仔出黎聽，該機使用冷門的2p3膽，全機六隻膽都係2p3，點解咁樣用膽呢？
就係因為便宜囉！
當你玩膽 Diy，到了常用膽都玩過晒，就會另找其他冷門膽落手，冷門還冷門，仍有分便宜膽和貴族膽可選擇，身份低的小徐當然選便宜冷門膽方向走吧。
現在已漲價一倍了
圖中膽的價錢已上漲了一倍，我當年買只係三元一隻，一次過買十隻面不改容，睇過網上沒有甚麼線路可供參考，只好根據膽的數據去自行由零開始設計，想過這膽用單端自給偏壓去造，計過有約0.3-0.4W功率左右，功率太細小造到出來用途也不大，咁就嘗試使用並聯單端線路去加大功率，造好後量度有0.7W的輸出，有進展但仍覺不足，再深層次去谷大功率，見屏壓最大可上到135V，信佢唔過打七折，就行95V高壓，進一步由自給偏壓改成固定偏壓，渣盡佢每一滴奶水，最後得出每邊有1W的強勁輸出。
有人會問 1W 真係夠用？
夠唔夠用睇配搭啫，找對高靈敏度的喇叭，聽歌仔一點也不含糊，反而沒有大功率機那份逼迫覇氣，從輕柔中帶點休閒的音色，又另有一種的音樂味道呢。
除了火牛是訂造，全機用的都是便宜零件或是拆機零件，就算只係過手癮，但牛牛質量也不能太低的。
睇片：
